مقتطفات فضالى | تحويشة العمر

#تحويشة_العمر
شايله فلوس أو دهب على جنب ؟ طب شايلاهم ليه ؟ لوقت عوزه ؟ إحساس بالامان مش عاوزه تحتاجى لحد ؟ طبعا لازم تشيلى ده انتى لو معملتيش حساب بكره تبقى عبيطه وخايبه !!
فاكره الشعور بتوع الناس التقيله اللى كنتى بتشوفيهم فى الكليه أو المدرسة ’ .مين فينا مكنتش عبيطة و عّمالة تتكلم إنها ذاكرت المذاكره الفلانية وحفظت كذا ’ واللى قدامها بتسمع منها و ساكتة ’ وبعد النتيجة تكتشفى إنك ناقصة  درجات على كام غلطة وهى اللى مقفله !! على فكره هى مش لئيمة ’ هى اشتغلت بذمة ’ يس فى صمت مالهاش فى البلالين و المفرقعات وجو الشو التعبان !!
مين من قرايبك اتفاجأتي بــ إنها جابت شقة ’  ومكنتش قايلة أى كلمة لحد " وده حقها على فكرة "  حقها تكون من ناس كتير مركزين على هدفهم ’ ومش فاضيين للكلام
و ساعتها بتكتشفى انك عبيطه اوى !!
أنا بقالى فترة غيرت سياستى خالص فى التعامل  !! أنا مش صغيرة  ’ أنا في الاربعينات ’ عندى خبره و تجارب و تعاملات كتير وبحب اتعلم من تجارب الأخرين
محدش فيكم ممكن يكون غيّر من نفسه قدى ’ ومعنديش بفضل الله اى غضاضه إنى اتعلم من أى حد حتى لو كان أقل منى خبره أو أصغر منى ’ مش بتكسف اسأل عن اى تفاصيل تطلعنى عبيطه قدام حد ! ’ فى الكليه كنت بسأل أسئله هبلة اوى و كان زمايلى بيتريقوا ’ و بعدين احترمونى جدًا لما طلعت الاولى عليهم !!
زى ما قولتلكم غيرت سياستى بحاجة مهمة جدًا وهى إنى بقيت اشيل حته على جنب تحويشة فى السر ’ مش حتبان و لا حد حيحس بيها بس حتنفعنى و قت ما احتاجها ومش بعد ومعرفش عندى كام ’ بس عاوزه اتفاجأ بالانجاز !!
هى مش فلوس  ؟ دى تحويشة العمر الحقيقى !! أناا على يقين صادق فى قلبى إن العيشة الحقيقية هى عيشة الأخرة ’  فبدأت احوش ليها كتير  ’ايوه لأنه يوم تقيل جدًا وصعب  ’ بصيت حواليا لقيت الكل بيصلى وبيصوم ’  قولت محدش يقولى صلاه و وصيام وحج  " دول قال عنهم النبى صلى الله عليه و سلم "  بنى الاسلام على خمس يعنى دول الاساس  ’ اللى البنايه حتطلع عليه ’ فقولت فين بقي البنايه ؟!
فــ بدأت احوش على جنب حاجه كده  ليوم هقابل فيه ربنا ’ وكان الممارسة الفعلية بدأت بالأتى
أول حاجة  أى ظلم بيقع عليا أو جرح بتجرحه ’ مش بتكلم و لا بشتكى ’ و حتى لو ظهر للناس إن الطرف الاخر اللى بيتكلم على حق ’ مش بدافع ’ مش خيبه و لا سلبية ’
ده  " احتساب "  لغه أرقى بكتير من إنها تتفهم لــ أى حد عادى .ثم  يعني اشتكى و اتحاكم مع مين مع مخلوق ؟  الإمام ابن تيمية  بيقول  " أنا جنتى و بستانى فى صدرى " وهى دى مرحلة التصالح النفسى و الارتباط بالخالق اللى  مش اى حد يقدر ينولها بسهولة (معية الله ) إن ربنا يرى قلبك ’ وقلبك يتونس بصحبته عز وجل و يحصلك اكتفاء ’ وطبعًا لسه بدرى اوى عليا عشان  أوصل للمكانه دى بس بحاول اتنفسها وأشمها  ونفسى اوصلها  ’ وبالطريقة دى بشيل حقى على جنب فى الآخره ’
اه والله تخيلى بقى حد ظلمك و يضطر يشيل من حسناته و يديكى فى وقت عصيب زى يوم القيامة أو ياخد من ذنوبك و يشيل ’ طب بالله عليكى عمرك شفتى تحويش على جنب و استثمار أحسن من كده !!
تاني حاجة كانت " مش ممكن نتساوى"
شوفت وعاشرت ناس دايمًا فى سباق ’ عاوزين يستغلوا كل لحظه فى عمرهم فى ثواب وطاعه ’ مرة بكلم واحدة عن عمل جميل هى عملته  ’ وبقولها أنا نفسى أقدر زيك أعمله لــ أنى أعرف إنه فرض ’ قالتلى  بكل هدوء جملة عظيمة " ولا شغلت بالى هو فرض ولا سنة ’ أنا عرفت إن ربنا بيحبه فعملته " وحعتنى الكلمه اوى ’ وانا اللى  تايهه بين الأراء ’ و ياترى العمل ده فرض و لا سنة و هى راحت من غير حسبة قالتله عملته يارب ’ حبًا فيك ’ ووقتها عرفت قد ايههى مليونيره و أنا مفلسة.’ وعرفت إننا مستحيل نتساوى !!
تالت حاجة سميتها  " كفاية تضييع وقت "
خيبه دى و لا مش خيبه لما يبقى حيلتك 24 ساعه  و انت ِ تحت رحمة زرار الريموت يوجهك من مسلسل تركى لاعلان طالع جديد !!
أنا بفضل ربى بقالى سنين معرفش أى حاجه عن التلفزيون نهااائى " ومحصليش اى حاجه غير إنى وقتى بقى أكبر و بركته زادت " اخترت اللى عاوزاه من النت
و مجاليش تخلف و لا ضعت ’ صحيح ممكن مفهمش إفيهات و مصطلحات بيضحكوا عليها اللى بيتكلموا معايا ’  بس بعرفها بعد كده و اتجاوب ’ ولو معرفتهاش حيحصل ايه يعنى ؟ الوقت اللى كان ممكن يروح عليا بلاش عرفت إن لازم يتحوش صح
رابع حاجة  " طالعه بدورين "
خلى بالك إن السعى الموجه فى الدنيا هو بردو ينفع يبقى سعى للأخرة لإن فى ناس فاهمة إن الدنيا و والاخرة دونت ميكس ’ وإن نحياة العابد الذاكر ’ .حياة لام تكون كلها زهد وحزن وعذاب وحرمان ’ فقررت أقسمها صح ’ وقت الشغل شغل بجد ’ ووقت الراحه و الفرفشة بأخد حقى تالت و متلت ’ اذا جددتى نيتك إن العمل خالص لله تقدرى وقتها تمارسى مهام الدنيا للأخرة ’ يعنى العمل بتاعك يبقى ملّمس دنيا على أخرة والأمثله كتير اوى ’ ابسطهم إنى أسمى الله و اشمر وابدأ كل يوم اقول لوجهك يارب النهارده حاحط قالب جديد فى بناء صرح أولادى ’ النهارده لازم يطلعلوا بحاجه جديده النهاردة ’ واستمتعى بالحصاد فى الدنيا و الاخره !!
طولت أنا عارفة بس اخر شوية حاجات
اسمعى نصيحتى ..وخدى البهريز  " اتعبى هنا علشان ترتاحى هناك ’ واحرمى نفسك من متع عبيطة حتبقى ملكة بعدين ’ ومتخليش حد يستدرجك لمعصية ’ مهما كنت شايفاها هينة ’ وبلاش مجاملاتك فى الغيبة و النميمة  ’ نازله معاكى قبرك لوحدك لو قدها اتكلمى يا ستى و اغتابى براحتك و سيبى لسانك !!
فرقى العاده عن العباده ( النية  ) كلنا بنطبخ...بس الطبخ عادة ؟ لا الطبخ طاعة لربنا ’ خلي نيتك كده بتقوى بده عيالك عشان يذاكروا وجوزك عشان يشتغل  وصحتك عشان تقفى بيها لله
بصى للى حواليكى ’ محدش عنده حاجه زياده عنك ’ كلنا واخدين ال 24 قيراط ولو اتعرض عليكى تبدلى ’ لما تشوفى حياة الناس التانيه بتفاصيلها حترفضى
" ربنا عدل و لا يكلف النفس إلا وسعها "  بقولك كده علشان متمشيش فى المنافسات المحمومه بين الستات  " كلنا عارفين مارثون السلايف و الجيران والقرايب دي ابنها دخل مدرسة كذا و عربيتها موديل كذا و أنا عيب أظهر أقل منها ’ لا انتِ بتعيشى حياتك مش داخله مسابقة ’ استمتعى باللى عندك من النعم  وإن كنتِ داخلة سبق يبقى ركزى على اللى قال فيه ربنا ( وَفِي ذَلِكَ فَلْيَتَنَافَسِ الْمُتَنَافِسُونَ)..تنافسى على رحيق الجنه ’ مش على روث الدنيا وزحمتها !!
كلمى ربنا كتير بلغتنا البسيطه  !! فين وريدك ؟ هو أقرب ’  اشتكى لو الملح نقص فى بيتك قوليله ’ لو بلوزتك اتقطعت اطلبى عونه قبل ما تخيطيها ’ لو ابنك وقع قوليله اشفيه قبل ما تجرى تشوفى رجله حصلها ايه ! خلى وصلك بربنا محطه أولى و تنطلقى بعدها ’ و قيسى على كده فى الصغيرة و الكبيرة  ’ ربنا مش رب الشدائد بس ربنا رب  كل شئ و مليكه ’ احنا اللى بنبعد ومنلجأش و لا نركز الا فى المصايب و وقت التعب ’ لكن وقت الراحه بننسى و نبعد و نرجع نقول احنا ليه تعبانين نفسيا !! (وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ )
أخر حاجة  " خلى رضا الله محور سؤالك دايما ؟
العمل ده حيرضيه ولا حيغضبه ؟ لو حيرضيه حعمله حبًا له ! ولو حيغضبه أنا مش قد عقابه ’ وامشى بالطريقه دى ’ الخوف من عقابه و الرجاء فى رحمته ’ خوف و رجاء .اوعى تمشى برة الجناحين دول ما ينفعش تطيرى إلا بيهم !!
اوعى تفتكرى إنى مثالية ’ و إن إبليس ما بيشتغلش عليا لا و الله ده انا ب نصح نفسى قبلكم ’ وبحاول ابقى كويسه لكن لسه مبقتش ’ بحاول بجاهد نفسى .و اسجد واقوله... أغثنى و نجينى وهى حقيقه واحده كل ماتتعبى ردديها
" دوام الطرق على الباب حيفتحه وانت بتسألى أكرم الاكرمين !!
#لصاحبتها