كان يوم عادي زي أي يوم في حياتي ولكن 5 دقايق مع الراجل ده كانت كفيلة تغيَّر نظرتي لحاجات كتير كنت شايفها غلط ..❤
كنت مستني مترو العتبة وأول ما جه دخلت وقعدت جنب الراجل ده .. باب المترو فضل مفتوح شوية راح دخلت أسرة ومعاهم ابنهم الصغير وبدون أدنى مقدمات وقبل ما الناس يقعدوا لقيت الراجل اللي جنبي قام راحلهم وفضل واقف يتكلم معاهم ويلاعب الطفل استغربت من الموقف جداً 😕 .. وفضلت اسأل نفسي :
•• ايه اللي خلى الراجل يقوم من مكانه والمترو بيمشي في حين الناس ما بتصدق تلاقي مكان فاضي ؟!
•• ايه اللي يخليه واقف على رجله أربع محطات وهو تاني ضهره أكتر ما باين في الصورة كمان عشان يتكلم مع ناس ما يعرفهمش ؟!
طبعاً مكونتش سامع بيقولهم ايه لأن صوت المترو كان عالي ولكن كل اللي شايفه إنه بيشرحلهم حاجة باهتمام شديد وأسرة الطفل بيهزوا راسهم بابتسامة استغراب وده خلى عندي فضول أعرف مين هو فاستنيت لحد ما هو نزل ونزلت وراه ودار الحوار كالآتي :') ..
= السلام عليكم حضرتك أنا مصطفى فتحي طالب ف طب الأزهر
- أهلاً وسهلاً " بحضرتك " !
= بعتذر عن فضولي ولكن أنا شوفت حضرتك واقف بتتكلم مع أسرة الطفل جوة وواضح إنك ما تعرفهمش وبتتكلم باهتمام شديد وعملت كدة مع أسرة كل طفل ركب المترو ! فبصراحة عندي فضول شديد أعرف كنت بتقولهم ايه ؟
- * بابتسامة خجولة تعتلي شفتاه * أبداً يا حبيبي أنا عملت اللي المفروض انت كمان تعمله من دلوقتي ! "")
= مش فاهم !
- بما إنك هتبقى دكتور فلازم تاخد بالك من كل حاجة حواليك وعقلك يبقى حساس من ناحية أي شيء ممكن يسبب مرض لحد أو ضرر جسدي ليه
= هو حضرتك دكتور ؟
- أيوة أنا دكتور أمراض قلب ❤ ... في المستشفى بيجيلنا حالات تصلب وانسداد في الشرايين نتيجة ارتفاع الكوليسترول وترسيبه على هيئة دهون فبيسد الشرايين وكل ما نسلك واحد نلاقي واحد تاني اتسد وده من ايه ؟ .. ما هو من البيبسي ! .. ولما شوفت أسرة الطفل داخلة من الباب وجايبين كانز بيبسي للولد افتكرت كل اللي بشوفه بسببه فمجرد تخيلي إن الولد ده ممكن يعاني بسببه في المستقبل كان كفيل إني أقف وانصحهم وكفيل يخليني أنصح أي حد ماشي في الشارع عشان مش عايز اشوفه زي اللي بشوفهم قدامي في المستشفى العسكري ( بدون ذكر اسمها )
أنا مُقدِّر إنهم عايزين يفرحوه بأي حاجة لكن ما يعرفوش إن البيبسي بيعمل مية على الرئة ميعرفوش إنه بيسبب الروماتويد وهشاشة العظام وآلالم في المفاصل والسمنة وتسوس الأسنان ! ... ميعرفوش إنه بيزود ضربات القلب أكتر من المعتاد وبيعمل ارتفاع في ضغط الدم والسكر ! .. ميعرفوش انه بيكون سبب كبير في سوء الهضم والصداع والإضطرابات العصبية .. يبني احنا زمان كنا بنستخدمه عشان نشيل الصدأ من على حتة حديدة عشان ننضف بيه البطاريات أو عشان ينضف الغسيل اللي فيه بقع زيت ونادراً ما نشربه .. دلوقتي الناس بقت بتشربه يومياً والترويج ليه زاد عن طريق إعلانات معظمها فيها أطفال وكله ماشي معصوب العينين مش عارف حاجة ! ..
كونك طالب طب ف"متعة العطاء " بتبدأ من وقت دخولك الكلية مش بعد التخرج بس .. أي حاجة تعرفها انصح بيها الناس أيا ً كان لونهم أو دينهم أو جنسيتهم لأن اللي بتشوفه قدامك واللي بيهمك تعرفه " ده مريض ايه ؟ " وبس ملكش دعوة بحاجة غير كدة وعليك إنك تعالجه
أنا شوفت مرضى قدامي بيتألموا وبتتأجلهم عمليات عشان اضطرابات في الجسم كان سببها كانز البيبسي اللي كانت في إيد الطفل دي .. فالموضوع بالنسبالي مش شوية بيبسي الموضوع بالنسبالي حياة إنسان ولكن " يا ليت قومي يعلمون " محدش بيدور ايه أضرار الحاجة اللي بيشربها وبيديها لأولاده ليل نهار هو كبر لقى كله بيشربها فقال أما أشرب أنا كمان !
يبني انت هتبقى دكتور .. مش وظيفتك تداوي مرض الناس وبس انت وظيفتك كمان توعيهم من الأول عشان ما يمرضوش أصلا واوعى تستصغر سبب يؤدي للمرض وتقول مش مشكلة وعديها ... ما هو ممكن ما يكونش البيبسي هو السبب الوحيد في حدوث المرض ولكن يكفى إنه مجرد " سبب " !
كان نفسي المترو ما يمشيش والله وكنت بتمنى أفضل معاه أسمع منه طول اليوم ولكن ! ''( ...
حقيقي كنت مستمتع جداً بكلامه وفضل يحكيلي عن عمليات ال open heart اللي عملها وأدق تفاصيلها لدرجة إني حبيت تخصص القلب بسببه ❤ ... الأبطال مش بس اللي بيظهروا في الأفلام ولا اللي بيطلعوا ع الشاشات انت ممكن تكون بطل وسوبر هيرو في مجالك والشهرة مش شرط عشان تكون قدوة لغيرك .. مقابلتي للدكتور أكتر مثل يناسبها " رُب صُدفة خير من ألف ميعاد " ...
هو أي نعم قالي ما تفكرش في الخطوبة غير وانت عندك 27 سنة وده اللي زعلني منه 😂💔 بس ده ما يمنعش إني حبيته جداً وإنه من أفضل الشخصيات الجميلة جدا اللي قابلتها في حياتي كلها ( إن مكانش افضلهم ) بتواضعه الكبير واحترامه
ليست هناك تعليقات:
إرسال تعليق