مقتطفات فضالى | قصة الشاب الذى يبكى عند المقابر

كنت فى المقابر فى جنازة والد صديق ليا ’ وفى اثناء وجودى فى المقابر باخد جولة كده على المقابر وابدأ بالدعاء للناس اللى هكون فى يوم مكانهم ’ بدأت اتحرك هنا شوية وهنا شوية وفى اثناء جولتى ’ لقيت شاب فوق التلاتين بشوية واقف قدام مقبرة وبيعيط وبيكلمها ’ كان كلامه مش مفهوم بالنسبالي ’ لكن وشه وصوته كان مليان بالحنين للى موجود فى المكان ده ’ قولت اروحله اطيب بخاطره واخرج معاه من المقابر ’ لكن كان عنيد ومتجاوبش معايا وزقنى ’ وقفت بعيد شوية وأنا الفضول واخدني تجاهه ’ وقررت اجازف واروحله تاني ’ وقولتله أنا والله مش عاوز اقطع عليك خلوتك دى ’ بس اكيد اللى موجود هنا محتاج يشوف ابتسامتك ’ قوتك ’ صلابة روحك ’ مش ضعفك ده ابدًا !! ابتدي يهدي شوية وحايلته شوية لحد ما خرجنا ’ كان عندى شوية وقت فقولتله تشرب معايا شوية قهوة ’ روحنا وشربنا وقعدت اتعرفت عليه ’ اتجوز من اربع سنين قعد مع زوجته سنة وسافر والغربة اكلت فيه كتير ’ ربنا مرزقهوش بعيال ومقدرش ياخد مراته معاه ومنزلش غير مرة خلال 3 سنين غربة ’ ومراته كانت بتتحايل عليه ينزل لكن الدنيا كانت واخداه ’ لكن نزل بس بعد ما فات الاوان ’ نزل عشان ياخد العزا فى مراته اللى خبتطها عربية وهى بتعدى الطريق وماتت ’ نزل وهو مقصر معاها ’ نزل بعد ما كانت بتتحايل عليه وتقوله إنها نفسها تشبع منه ’ نزل بعد ما كان بيتريق علي سذاجتها وكان بيقولها بطلى " محن " ودلع بنات ما انا فى الغربة عشانك ’ نزل من غير ما يقولها حاجات كتير شايلها جوه قلبه عشانها ’ وقالها لما مبقتش سامعاها !! من ضمن كلامه " كان نفسى امسح بــ إيدى على رأسها واعرفها إنى بحبها جدًا وإنى كنت اغبى إنسان يوم ما قررت اكمل فى غربتي واسيبها ’ وكنت اكتر غباء لما مبلتش ريقها بكلمة كان قلبي آسى ومش قادر يقولها ’ ومقالهاش غير بعد فوات الاوآن "
ودعته بعد محاولة لكلام يحتوى لحظة وجعه ’ ويحاول بيه يكون اكثر ثبات وصبر ’ لكن وانا جوايا حزين ’ حزين على لحظات بنضيعها من غير وشوش اللى بنحبهم ’ من غير ما نتعطر بريحتهم ونشبع منهم ’ من غير ما نحضنهم وقت طويل ونقولهم إنهم اكتر ناس فراقهم بيعذبنا ’ حزين لإننا مبنقدرش نعبر غير بعد ما يفوت الاوآن !!
ورسالتي لكل اللى بيقرا " اخبروا الآن من تحبوهم أنكم تحبوهم ’ وأنظروا جيدًا لــوجوههم الطيبة فربما لا يتكرر اللقاء  ’  واعلموا انه ليس الوجع في أيام الفقد الأولى بل حين تأتي الأيام السعيدة فتجد أن من يستطيع مشاركتك بشكل أعمق قد رحل :))
#محمد_فضالي